Die eerste twee skouhuise by die nuwe behuisingsprojek in Uniondale is Vrydag amptelik aan die twee nuwe eienaars deur die Uitvoerende Onderburgemeester van George, Rdl. Daniel Maritz, oorhandig.
Rdl. Maritz het met die lintknip-seremonie spesifiek die span van Menslike Nedersettings, Grondsake en Beplanning, die raadslede betrokke in die proses asook die twee kontrakteurs betrokke, mnr. Andrew Burger van Golden Rewards en mnr. Randal Sauer van RK Sauer Construction bedank vir hul harde en goeie werk.
Hy het gesê as ‘n mens in die gemeenskap rondbeweeg, ervaar jy die noodkreet vir behuising. “’n Huis beskerm teen wind en reën en is ook ‘n belegging,” het Maritz gesê.
Mev. Hilda Jack (58) wat al sedert 1997 op ‘n waglys is vir ‘n huis, was eerste in die lyn om haar nuwe huis te ontvang. Jack was emosioneel toe sy almal bedank het vir die huis, na jare van rondswerf. “Ek sal nooit my huis verkoop nie en hoop om dit vir my kinders agter te laat,” het sy gesê.
Mnr. Anthony Engelbrecht en sy vrou, Jane, is die begunstigdes van die tweede skouhuis. “Na 20 jaar het die Here my gebed verhoor, ek is baie dankbaar vir raadslid Kleynhans,” het mnr. Engelbrecht gesê.
Mev. Engelbrecht het gesê sy is baie trots op haar huis en het ook die bouers bedank.
Mnr. Steven Erasmus, direkteur: Menslike Nedersettings, Grondsake en Beplanning, het in sy toespraak gesê dié huis lyk baie beter as baie Gap-behuising wat hy al gesien het. Hy het gesê die standaard van die huis is puik.
“George Munisipaliteit het wegbeweeg daarvan om net ‘n huis te verskaf, maar wil voortaan kwaliteit huise verskaf. Ons deel vandag in Uniondale se opgewondenheid,” het hy gesê.
Die twee skouhuise ter waarde van R150 000 elk, is deel van ‘n EPHP (Enhance Peoples Housing Process) behuisingsprojek wat bestaan uit 183 huise. Skouhuise is gebou volgens die nuwe minimum norme en standaarde van die provinsiale departement van Menslike Nedersettings.
Die bou van die twee tipes skouhuise is op 5 Mei 2014 begin en is op 6 Junie 2014 voltooi.
Die een tipe skouhuis is met sementblokstene en die ander met maksi-kleisteen gebou. Albei huise is geteel met ‘n drupbak by alle krane, 100 liter geyser en ‘n kombuiskassie met ‘n opwasbak. Die huis deur RK Sauer gebou het ook ‘n wastrog en ‘n buite- wasgoedlyn. Die huis deur Golden Rewards het ook geute en luggate met ‘n stortverlenging.
Die wonings bestaan uit twee slaapkamers, ‘n toilet met bad en gesigwasbak, ‘n oopplan leefarea met ‘n kombuis.
